Sulutani Laelani

Cumula-cula'o io La Tunde

Wula otolu ta'u1996

Dahomo rekamano

A'ai, io cula-cula a'ai, io cula-culano Sulutani Laelani.

Sulutani Laelani ileu mekabua i Malaoge te para boseno ndo'orua. Sabucuno ndopekabua a'iso, imopita colondo. Ah, kando pepisilaa io po'ontohando io silano api kadi Kolinsusu a'ai. Jadi, itena'indamo para bose bendo leu mo'ala api. 

Sabucuno ndoteleu a'iso, kua'iko indade rumame-rame io lakino Lemo. Damoriwanga kai lense manusia. Sabucuno, wangu molingaano mewangu, mewangupo kando teurua. 

Teurua a'iso, iamaraki'indamo. Iamaraki'inda a'iso, taeno "Iseepo, waopu," taeno, "Beto pogaupo." "Kai molingaa kato leu," taeno, "Kato teusoa darumame-rame io lakino Lemo, kando lense mia. Sabucuno kai limba lumense, daho samia cina a'iso napo topo'onto i dunia a'ai kakesano." "Jadi," ko'unimo sulutani, "mentee dahopo deedeno." Taeno, "Io rongkohanopo, ingkomiu." "Oh," taeno, "kulako te ungkude deedeno." 

Jadi, ompuduno oleo a'iso ndobosemo kando leu. Ndoteleu ri'ario, ndo'umpa i ri'ai i Malalanda. "Ah," ndoko'unimo para bose, "Ngka'umpehano, waopu?" taeno, "Beto poonemo." Taeno, "Boo lipo, malalandapo." Aruamo kai pengeehako Malalanda. Taeno, "Beto poonemo, waopu." Taeno, "Iseepo, imora-morawupo" keo tangari Ngkolinsusuno. 

Sabucuno mora-morawumo, ndopoonemo kando hule. Teuraa io Sulutani indade kadi ndopesili-silimbu i tompa-tompano mia. Kando limba lumense cinahako, ilimba samia, taeno, "Io a'isomo?" Taeno, "Inao." Limba samia lumense, "Na inao." 

Sabucuno damo umengka pajara, ikorungkemo io bongka manu. Kua'iko Waode Bilahimo mina'ino lumense. Pina'ino a'iso, kai lense, taeno, "Asoahomo, waopu." Sabucuno sateleuno bei bulili, bei poone i raha, ndo'ada'o i pu'uno esa. Sateleuno ri'iso, ndokopuio. Ndokopuio a'ai, igoramo taeno, "Isee," taeno "waopu," taeno, "Sulutani Laelani." Ndoko'unimo mia, "Hapai kau pongeengee a'iko, a'iko apuntomo i Wolio?" Sabucuno kua'iko kando hundawi'ako'inda hulu, io indade monona. Jadi ri'iso ndo'orusu'indamo kando kawi. 

Sabucuno sawula ndo'ari kumawi, io sulutani bansulemo rope Wolio kua'iko io Waode Bilahi a'ai sagiumo. A'isomo kai dumaa anano io La Ode-ode, mengeehakono La Ode-ode. Jadi, La Ode-ode a'iso hina iteto'orio tamano, kadio cinano. 

Sabucuno ndopekaraha-rahamo te anando mia nsuere, indade ndoko'uni, "Io cinangku bukuno peri," taeno, "tamangku mokoleno Banggai." Inade cinano Waode Bilahi, tamano hina iteto'orio. Iowosemo, to'orimo gumau, bansule i raha taeno, "Indade mia maka daho tamando, ungkude maka ida'a." Taeno, "Daho tamau duka ingko'o, io sulutani dai Wolio." 

Jadi, sa'owoseno a'iso, iporombomo koroka. A'aimo kai pengeehako Rombo a'ai, porombohano koroka. Bei lako humunio kota Wolio ke hina i'awao tamano. 

Sabucuno iuleaho io koroka a'iso kai lako, iteurua ipoone'ako ganda-ganda i Wolio. Jadi, io jumagano saragenti, ndohulemo lumaporo i sulutani taeno, "I bangkanomo inai arua maka ipooneako ganda-ganda." Taeno, "Mi'intipu'o." Jadi, poone-poone a'iso, ndo'ontohomo ngka inade La Ode-ode pesudo-sudomo i pu'uno kokambu. Itepoone a'iko, ndolaporomo mpendua, taeno, "Ke ngkaa'iko, maka hongu-hongunto, waupo." "Ke ngkaa'iko," taeno, "mimpoonetako ri'ai." Poonetako i kamali, po'iahano sulutani. Jadi, ri'iso a'iso ito'orimo potae io anandomo i Kolensusu. 

Ri'iso, icia'omo haku. Tangkanomo kasulutani dai Wolio. Maka i Kolensusu kadimo icia'o io padumaaho sapati, padumaaho kinipulu, padumaaho kapita lau, ipadumaaho io lakino Kolensusu, ipadumaaho saluwuo saragenti, io saluwuo sara ngkana i Wolio, kadio kasulutani dai Wolio. 

Jadi cumia'o a'iso haku a'iso, bansulemo. Teleuno a'iso, ipotadeomo sara ri'ai. A'isomo io sara ri'ai, kai dumaa kinipulu, kai dumaa saragenti kai dumaa kapita lau kai dumaa io saluwuo giu io parintamo tineleuhako mina inade, inalano i wita Wolio. 

Arimo.

Imembali mirongeo cula-cula a'ai i larono tangari Kolensusu. Imembali duka mi'alao pdf. I larono pdf a'ai, io cula-cula a'ai ibinuri i larono otoluo pogau.