Ni'i Ngka'ulo-ulo

Cumula-cula'o io La Ode Umar M.

Ta'u 2013

Da'apo rekamano

Daaho ana ntamahako dando opicu, ndopo’onto samia cina pompetama-tama. Ipompake songko te baju ntama. Ibiasa moone ni’i ngka’ulo-ulo. Tamahako a’iso ndoko’uni, “Ingko’o a’ai io cina.” Ilawani, “Inao, ungkude a’ai io tama.”

Taendo tamahako a’iso, “Ke ngkaa’iko tandaio upoone ni’i, keu tepoone’o koma’ana ingko’o a’ai io tama, ke hinau tepoone koma’ana io cina. Leumo tolako i pulo a’iso topoone ni’i.” Pociba’ako tamahako a’iso hinando tepoone, io cina a’iso itepoone maliwa kai leuho lolono ni’i tei poone i polopano. Tamahako a’iso ndopogau, “Koma’ana inade a’ai io tama.”

Sai teuraa i lolono ni’i ipelihemo i rahano. Ontohomo balo-balo i ba’ono rahano, kai waa tei curu e’eno matano. Tamahako itonia ndocineio e’eno matano, kando silepio, kua’iko imo’ahi namino. Ndoko’unimo tamahako a’iso, “Ingko’o a’ai io cina.” Cina a’iso iko’uni, “Oh inao, matangku ikikio humeono ni’i kaku eso’o kai limba e’eno matangku.”

Ndoko’unimo tamahako a'iso, “Tandaio to’umemekio kulino pongoci a’ai, kei sombu koma’ana ingko’o io tama.” Sai umemekio, kua’iko isombuho kulino pongoci a’iso te io tamahako a’iso ndosombuho duka. Taeno tamahako a’iso, “Oh, ingko’o a’ai io tama.”

Rouno ndorahiakonomo cina itonia potae io tama, igaumo, “Ke ngkaa’iko, beku bansulemo i kampoku. Ndowawaimo cina a’iso i labusa, kai poone i bangka.

Sai olai ibintanio labusa, iwungkahiomo songkono, kai cuuna wuuno, leuho wicino, sa’arino kai wungkahio baju ntamano, kua’iko inade a’iso io cina.

Ahirino ndo’onoo tamahako a’iso ndokalawu-lawua. Ndosabumo i tahi kando nangi lumahari bangka a’iso. Daaho samia tama iko’imani, nahina isabu numangi, ako kadi isawi i koli-koli kai bose lumahari bangka a’iso kai leuho kampo tei salamati.

Sai leuho i kampo, tama samiano a’ai ipoonemo i rahano tamano cina a’iso, kai pogau, “Ungkude a’ai io jodono anamiu, teku mo'iliako kumawiakono rouno ungkude a’ai lumeuho i ri'ai .”

Ahirino ndopakawi’indamo. Io tamahako ndo’onoono itonia ndomatemo i tongano olaro.

Arimo.

Imembali mi'alao pdf. I larono pdf a'ai, io cula-cula a'ai ibinuri i larono otoluo pogau.