Miano Konawe

Downloads: 

Cumula-cula'o io La Tunde

Wula otolu ta'u1996

Dahomo rekamano


Io cula-cula a'ai, io cula-culano miano Konawe. Miano Konawe a'iso, ndoleu ndopinda i Kulisusu sansa-sansahinaa'inda.

Cumpe-cumpeno, ndoteleu ndopo'ia Ngapa i Sori, ndopepombulaa. Sabucuno, hinando tara ri'iso. Ndopekaindea punci sampe ndopodoio puncindo, kando petondo'ako rounomo icinciako sori.

Arino a'iso, ndopinda i tangkeno Ungka-ungkaya. Ndopinda i tangkeno Ungka-ungkaya, ngka'iko duka. Nando taraako sori.

Arino ndopinda i Doule. Ndopinda i Doule a'iso, ndopepombulaamo i ri'iso. Ndopepombulaamo, kando tondo'akono labu, kando pombula pae. Sabucuno io tondono labu ndopombula pae a'iso ipuraho bawu. Bawu a'iso, nai to'orio pesalangano. Jadi, ipo'ala'akono dahu kai dahu'o, kai polemba karada, kai lingka.

Sabucuno, itepina'i i ngapa, iawamo mia dangumara matano oleo. A'aimo Wamboule kai pengeehako Mata Oleo.

Arino a'iso, kai lingka, i'awa'inda manusia, indade mo'ala bakeno kaloba i laro epe. A'itamo kai pengeehako Epe.

Arino a'iso, kai lingka, iawamo mia, indade mo'ala bakeno jampaka. A'itamo kai pengeehako Jampaka.

Arino a'iso, kai lingka, sabucuno ri'ai i Membuku i'awamo mia dapumopoiko tambukuno bangkano. A'ikomo kai pengeehako Membuku.

Arino kai leu iawa mia dakowuru-wuru mocuri. A'ikomo kai pengeehako Mowuru.

Arino a'iso kai leu, ri'ita i'awaomo duka ngapa io wacu da'otolu. A'ikomo kai pengeehako io Ngapano Wacu Tolu Boto.

Arino a'ai, leumo i ngapa i komba, kai awa'inda mia indade mongkocu komba. A'ikomo kai pengeehako Ngapa i Komba.

Arino ilakomo, kai awao mia dakotoro-toro i bone, imorutamo kuduno salano. A'itamo kai pengeehako Bone Moruta.

Kai lingka duka, iawaomo io bone. Sabucuno bone a'iso iowose boneno. A'ikomo kai pengeehako One Ea.

Sabucuno kai lingka duka ri'iso, i'awaomo mia damo kumora bumobo i sampunio ndoke i pombulaano. A'itamo kai pengeehako Ngapa i Sampuna.

Kai lako, kai lingka duka iawaomo ndoke a'iso dasawonua. Ri'isomo, kai pengeehako taeno Wonua Ndoke.

Arino kai lingka, i'awa'inda mia, indade kototoro i korono bawu. Aruamo kai pengeehako Koro lansu arua.

Arino a'ai, ilimbamo i Kotawo. Limba i Kotawo, i'awamo buaea dame'awu i lapa mpae. Asoamo kai pengeehako Kotawo.

Arino a'ai, kai limba i Pina'o, ri'iso imokokondo'umo dahuno. I ri'isomo ka'umpehanomo kalencu ka bei pondo'u dahuno? Jadi, cumbupako karadano, kai limba io e'e sampe oleo a'ai io matano i e'e ngineahako Pina'o.

Mangkaano kua'iko io bawu a'ai ole-oleo i hule i Wanse. Mata malo kai leu. Minai Tampuno Koro ipesala i tontono wita. I ri'araa, tonga-tongano pombulaano kai limba.

A'iso po'ianomo i Doule kando ngeehakono mia a'iso lakino Doule.


Imembali mirongeo cula-cula a'ai i larono tangari Kolensusu. Imembali duka mi'alao pdf. I larono pdf a'ai, io cula-cula a'ai ibinuri i larono otoluo pogau.


BACAHO
CULA-CULA
NSUERENO