Anano Lakino Lipu Ndorapia

Cumula-cula'o io La Ode Umar M.

Ta'u 2013

Da'apo rekamano

Anano Lakino Lipu ndolahiri ndorapia. Ngeeno Tobo Walambangi Dunia te Hancu Pata Alamu. Salahirindo i orahando daahomo burino ngeendo. Sando owo-owose dopoweweu’ako’indamo karaha-raha io tobo te hancu. Sarangkano ndoweweuo minaa i bulawa. Sadia ndopesaka’i i tongano raha. Nai lembahi a’iko ndopepeoliakomo manu ntama bo perumpano.

Ndopesangomo bendo pinai i hale bo mepaporumpa manu. Sa’arino ndopina’i i tontono raha, kando limba i oloncuduo, kando limba i sambalino tondo. Sabilano a’iko ndolakomo i rahano mia nsuere. Nai lembahi a’iko ndopo’awamo bangka humela i tahi kando poone sumawi kando hela duka.

Tamando imarewu larono, rouno ilembahimo nando bansule i raha. Ndoriso’indamo sara bendo hohalu’inda, ako hiina ndo’awa’inda. Rouno imopii larono cinando te tamando. sampe-sampe kendo poronge manu totorea ndosumbele’o; ndoporonge dahu humopa ndopandoho.

Nai lembahi a’iko teleumo bangka i labusa tendo peganda. Lakino Lipu pontenamo sara ndolako sumasi’inda isee ndopompako’uni ganda. “Mingkuani’inda mia i bangka arua,” taeno Lakino Lipu, “Ungkude a’ai kumarewu te hiina kutekocuri. Anangku Tobo Walambangi Dunia te Hancu Pata Alamu lembahimo ndolingka hinapo ndobansu-bansule. Milako sumaario bangka megandano arua.”

Sando teurua sarahako ri’arua ndosasi’indamo. Miahako i bangka a’iso ndoko’uni, “Ingkai hiina beto pentaa mompako’uni ganda a’ai, keo Lakino Lipu hinapo iba’awa te ingkai.” Ahirino Lakino Lipu ilako umawa’inda. Sateuruano ri’arua, ndopecukanamo, “Io hapa minarewu’akomiu kami sasikai mompako’uni ganda?” Lakino Lipu ilawani, “Kumarewu, rounomo anangku Tobo Walambangi Dunia te Hancu Pata Alamu lembahimo ndolingka.” Lakino Lipu hinai to’orio, kua’iko anahako a’iso indade i bangka a’iso.

Ahirino orua’inda anahako a’iso ndowungkahio bajundo, te’onto daaho burino ngeendo i orahando, te duka ndo’ontoho daaho tobo te hancu mesarungkaako bulawa, katandaino potae orua’inda anahako a’iso io ananomo Lakino Lipu, Tobo Walambangi Dunia te Hancu Pata Alamu, kando pekakopui te ndopangka.

Sa’arino a’iko, ndobansule i rahano Lakino Lipu temo duka mia rahano Tobo Walambangi Dunia te Hancu Pata Alamu. Ndolingka hiina ndopepinda i wita, ako ndopepinda te ndolingka i wawono kae bula minaa i labusa kendo leuho raha. Sando teuraa i raha, ndokokaria tendo rame-rame.

Arimo.

Imembali mi'alao pdf. I larono pdf a'ai, io cula-cula a'ai ibinuri i larono otoluo pogau.